Makali ya Dk Mwakyembe 

yaanza kukata watuhumiwa

 wa ‘unga’

Waziri wa Uchukuzi, Dk Harrison Mwakyembe 

Dar es Salaam. Wafanyakazi wanne wa Uwanja wa Ndege

 wa Kimataifa wa Julius Nyerere (JNIA), wanaotuhumiwa

 kula njama za kupitisha kilo 150 za dawa za kulevya aina

 ya Crystal Methamphetamine, wamesimamishwa kazi.

Mkurugenzi wa JNIA, Moses Malaki, alisema jana, kuwa 

utaratibu wa kuwapatia barua umekamilika, kinachofuata ni

 utaratibu wa kuunda tume unaotarajia kufanyika wakati

 wowote kuanzia jana.

“Tumewapa barua zao rasmi kuwasimamisha kazi leo (jana)

 saa 8:00 mchana, kama watakuwa na cha kujitetea, wasubiri

 tume itakayoundwa wakati wowote kuanzia sasa,” alisema Malaki.

Alisema tume hiyo itafanya kazi kwa siku 14, ikiwamo kuwahoji 

wahusika baada ya hapo itatoa maelekezo serikalini.

Kuhusu watuhumiwa hao kupelekwa polisi, Malaki alisema suala

 hilo wanaliachia chombo hicho kutekeleza wajibu wao kisheria.

Hatua hiyo inatokana na agizo la Waziri wa Uchukuzi, Dk Harrison

 Mwakyembe, alilolitoa wiki iliyopita kuagiza wote waliohusika na 

njama hizo kuchukuliwa hatua za kisheria.

Katika hatua nyingine, Baraza la Viongozi wa Dini la Kupambana na 

Dawa za Kulevya nchini, limeomba polisi kumwongezea ulinzi 

Dk Mwakyembe kutokana na mapambano yake dhidi ya dawa hizo.

Kauli hiyo imekuja siku chache baada ya Mwakyembe kutangaza

 vita na waingizaji na wasafirishaji wa dawa za kulevya, wanaotumia

 JNIA na kusababisha kuonekana uchochoro wa dawa hizo.

Mwenyekiti wa baraza hilo, Alhad Mussa Salum, alisema kutokana

 na ukubwa wa tatizo hilo nchini, jamii inapaswa kuwa na mikakati 

shirikishi ya kuondoa mtandao huo unaotisha.

“Kwa sababu mtandao wa dawa za kulevya unatisha, tunaomba

 polisi imwongezee ulinzi Mwakyembe kwa sababu anapambana

 na watu hatari na hawatamwacha,” alisema Salum.

Baraza hilo linajumuisha viongozi mbalimbali wa dini zote

  wakiwamo masheikh, maaskofu na wachungaji.